නික්මීම? පලා යාම?

හැර යා යුතුය මේ අහස දැන්
භාර කරමින් වේදිකාව
ඔබ හා එක්ව රඟන්නට මට වරම් නැති රැඟුමට

පැමිණ දහසක් තරු කැට
හෙළන නෙතගින් බැලුම් ම දෙසට
පවසාවි ඔබව වට කර කළ නො කළ යුතු මේ යැයි

ඊට පෙර යා යුතුය
පලා යා යුතුය
පැරදුණු නිසා නොව වැටහුණු නිසා

දිවාවක් දවන ලද 
දිවාකර තෙද බිඳී
සැඳෑවත් නිමා කර සඳුගෙ සඳ පැමිණේවි

ඊට පෙර යා යුතුය
පලා යා යුතුය
මෙලෙසින් වර්තමානයේ අනාගතයට ඇති බියෙන්

පැතුවත් කොතෙක් රැඳෙන්නට
හිරු සඳු එක්ව එකම අහසක
බලා ඇස් කොනින් දොස් සම්මතය නගයි උස්

ඊට පෙර යා යුතුය
පලා යා යුතුය
වෛරයෙන් නොව නොපෙනෙන අරුම සෙනෙහසින්