මතක මා ළඟ තියා

අවැසි නම් යා හැකිය නුඹට මා හැර දමා
නමුදු නුඹ ගැන සිහින මගෙන් උදුරනු එපා
යාවි යැයි හිතෙද්දිත් දුක සරයි හද පුරා
ඊට පිළියමක් ලෙස කුමට මා අවි දරා

පළමු දසුනේ සිටම නුඹට මා නතුවෙලා
දුටු සියලු සිහිනෙකම රැදෙව්වෙමි පටලලා
අහිමි යැයි සිතුවොතින් ගොසින් හද පිච්චිලා
එදවසට බොහෝ දේ මගෙන් ඇත ගිලිහිලා

හිතැති මද සිනාවට එසැන මා ගල්වෙලා
නමුදු එසැනින්ම නුඹ හදේ තැන්පත් කලා
එතැන් සිට හද ගැස්මෙ අමුතු වෙනසක් වෙලා
විඳි තනිය නොදැනිවම හදවතින් ගිලිහිලා

සැමතින්ම ලැබෙනමුත් හිනාවන් මුවපුරා
ප්‍රති සිනාවන් හලමි නොකර නොමනා නිසා
තරම කළඳක් වුවද නුඹ පාන මද සිනා
පුන පුනා එය විඳිමි නිතර මතකෙට නගා

හැඟෙන දැනෙනා පරිදි තැනක ඇත හිරවෙලා
විසඳුමක් නොමැතිකම හිතට වදයක්වෙලා
අහිමි බව හැඟෙනමුත් වෙසෙමි වෙනතක නොයා
යනදාක යනු මැනවි මතක මා ළඟ තියා

lassanai aiye